«Няма такой сітуацыі, дзе б патрабавалася дапамога, ішла гаворка аб няроўнасці або крызісе эканамічным ці грамадскім, на якую не звярнула б увагу Фламінія Джаванэллі, першая свецкая асоба, прызначаная намеснікам сакратара Папскай рады „Iustitia et Pах“», — гаворыцца ў чарговым нумары штотыднёвіка Апостальскай Сталіцы «L’Osservatore Romano». У выданні змешчана інтэрв’ю з Фламініяй Джаванэллі на тэму дзейнасці Папскай рады, а таксама месца жанчыны ў Касцёле.

«Касцёл я бачу на руках Яна Паўла ІІ і Маці Тэрэзы з Калькуты, — апавядае ў інтэрв’ю намеснік сакратара ватыканскага ведамства. — Я думаю таксама аб шматлікіх сёстрах законных, якія ў сваіх супольнасцях практыкавалі не толькі міласэрнасць, але таксама ўпраўлялі гаспадаркай, стваралі шпіталі, а перш за ўсё падтрымлівалі ў духоўным жыцці сваіх сябровак, цешачыся ўсведамленнем сваёй працы. Існуюць і іншыя сферы жыцця Касцёла, у якіх жанчына выконвае вядучую ролю, напрыклад духоўнае кіраўніцтва».

«Калі сакрамэнт пакаяння і паяднання мае выключнае значэнне для хрысціяніна, таму што яднае яго з Богам, — працягвае Фламінія Джаванэллі, — то мае фундаментальнае значэнне і духоўнае кіраўніцтва: разуменне, усведамленне таго, што грэх быў нам прабачаны, не заўсёды нараджае пачуццё, што мы атрымалі прабачэнне. Наколькі ж важная тады дапамога іншага чалавека, што дапамагае нам распазнаць план, які Пан мае для кожнага. Менавіта такую дапамогу можа аказаць жанчына, якая з’яўляецца асабліва ўражлівай і чуйнай».

«Я лічу, што наданне большай увагі духоўнаму кіраўніцтву магло б адначасова ўзмацніць ролю жанчыны ў Касцёле», — адзначае Фламінія Джаванэллі.