У Навагрудак на сёлетнія ўрачыстасці 72-годдзя мучаніцкай смерці 11 сясцёр назарэтанак, якія 1 жніўня 1943 года былі расстраляны фашыстамі, прыйшла пілігрымка з Новай Мышы (Пінская дыяцэзія). Такім чынам, пілігрымка, якая існавала раней, але апошнія гады па розных прычынах не магла быць арганізавана, аднавілася.

Пілігрымы – 25 чалавек на чале з кс. Паўлам Врубелем, пробашчам парафіі Перамянення Пана ў Новай Мышы – пакінулі штодзённыя клопаты, жадаючы аддаць пашану ахвяры сясцёр-мучаніц і самім ахвяраваць гэты шлях на хвалу Божую. Пілігрымы ішлі пешшу два дні, каб маліцца і ўшанаваць памяць благаслаўлёных мучаніц.

Раніцай 30 ліпеня падчас святой Імшы, якая распачала пілігрымку і якую цэлебраваў кс. дэкан Валянцін Новак, які стаяў ля вытокаў гэтай пілігрымкі, ішоў дождж і ўвесь небасхіл быў зацягнуты хмарамі. Пілігрымы маліліся аб Божым благаслаўленні і ласцы на гэты шлях, і калі выйшлі з касцёла, каб скіравацца ў дарогу, на небе не было ні воблачка, а сонца ярка свяціла і сагравала. Такое надвор’е спадарожнічала вернікам на працягу ўсяго пілігрымавання, ажно да моманту, калі скончылася ў Навагрудку.

Прайшоўшы за два дні больш за 60 кіламетраў, пілігрымы ўдзельнічалі ў святой Імшы на месцы мучаніцтва благаслаўлёных сясцёр у лесе пад Навагрудкам разам з пілігрымамі з Гродна і іншых куткоў Беларусі. Адтуль яны разам скіраваліся да навагрудскага фарнага касцёла. Разам з вернікамі ішоў біскуп Пінскі Антоні Дзям’янка, які яшчэ перад Эўхарыстыяй сустрэў пілігрымку з Новай Мышы і прайшоў з ёй апошнюю частку дарогі.

Каля касцёла была падрыхтавана спецыяльная праграма з малітвамі і вясёлым вечарам. Яна завяршылася святой Імшой у 4.30 - час, калі аддалі сваё жыццё благаслаўлёныя сёстры назарэтанкі.

Пілігрымка скончылася, але яе ўдзельнікі, якія адкрыліся на дзеянне Духа Святога, спадзяюцца яшчэ доўга збіраць яе плёны. Яны маюць надзею, што адноўленая пілігрымка цяпер будзе вырушаць у гэты шлях штогод і збіраць усё больш людзей, якія жадаюць такім чынам выразіць сваю веру, ушанаваць памяць мучаніц і засведчыць сваім жыццём, што “на Беларусі Бог жыве”.
 
Андрэй Багдановіч, (AG)