Больш за сто чалавек сабралася 18 кастрычніка на штогадовай сустрэчы моладзі ў брэсцкім касцёле Узвышэння Святога Крыжа. Маладыя вернікі з’ехаліся з усіх куткоў Беларусі. Імшу ўзначаліў біскуп Пінскі Антоні Дзям'янка.

Для многіх гэта ўжо далека не першая сустрэча, але яны зноў і зноў прыязджаюць на сустрэчы ў Брэсце, чакаючы духоўнага ўзбагачэння, сюрпрызаў і порцыі пазітыву, якія ўмела звычайна спалучае і падае брэсцкая моладзь. Падарункам для гасцей гэтай сустрэчы стала выступленне маладога хрысціянскага гурта The Crossway.

У гэтым годзе сустрэча, прысвечаная пытанню духоўнай барацьбы, была прымеркавана да святкавання 100-годдзя з дня нараджэння кардынала Казіміра Свёнтка. Урачыстая Імша з нагоды гадавіны будзе праходзіць 25 кастрычніка ў пінскім катэдральным касцёле Унебаўзяцця Найсвяцейшай Панны Марыі. Звяртаючыся да ўдзельнікаў сустрэчы, біскуп Антоні Дзям'янка запрасіў моладзь прыняць удзел у святой Імшы ў Пінску, каб ушанаваць памяць чалавека, дзякуючы служэнню якога ўдалося адрадзіць Касцёл у Беларусі.

Пасля прывітальнага слова біскупа і апекуна сустрэчы кс. Яцэка Дубіцкага маладыя вернікі разбіліся на некалькі груп на чале са святарамі, у якіх абмяркоўвалі пастаўленае пытанне духоўнай барацьбы. Потым моладзь прэзентавала зноў, хлопцы прэзентавалі вынікі сваіх дыскусій. Час пасля абеду моладзь прысвяціла творчасці. Кожны выбіраў цікавы для сябе накірунак. Адны стваралі кветкі з гафраванай паперы, іншыя майстравалі міжнацыянальны сцяг, трэція вучыліся майстэрству фатаграфіі, а ў чацвёртых быў майстар-клас па музыцы, які праводзілі ўдзельнікі хрысціянскага рок-гурта United In Spirit.

Пасля вячэрняй святой Імшы настаў час для завяршальнага і аднаго з самых яркіх і запамінальных момантаў сустрэчы — выступ хрысціянскага рок-гурта. У гэтым годзе канцэрт даваў гурт The Crossway. Гэты малады калектыў, які складаецца з 14 чалавек, утварыўся зусім нядаўна па ініцыятыве кс. Паўла Рудзьмана ў Баранавічах. У Брэст хлопцы прывезлі ўласную рок-інтэрпрэтацыю вядомых хрысціянскіх спеваў, а таксама ўласную кампазіцыю.