У касцёле Нараджэння Маці Божай у Гомелі (Пінская дыяцэзія) змешчаны стацыі Крыжовага шляху, вырабленыя бернардынамі з Літвы. Падчас візіту пробашча гомельскай парафіі кс. Славаміра Ляскоўскага ў бернардынскі кляштар у Літве была заключана дамоўленасць аб тым, каб зрабіць роспіс алтарнай часткі і галоўнага абраза беларускай святыні.

Пасля заканчэння прац на сцяне за алтаром, дзе цяпер знаходзіцца абраз Маці Божай Чэнстахоўскай, з’явіцца вялікая фрэска. Аб гэтым паведамляецца на сайце гомельскай парафіі.

«Літоўскія госці зробяць роспіс карціны Нараджэння Божай Маці, таксама будуць намаляваны выявы святога Андрэя і святога Пятра, каб паказаць адзінства Цэркваў Усходу і Захаду. Пакуль невядома, калі дакладна распачнуцца працы, аднак ёсць надзея паспець да бліжэйшага Вялікадня. Тады касцёл, нарэшце, больш-менш набудзе той выгляд, які быў задуманы з самага пачатку», — адзначыў пробашч парафіі кс. Славамір Ляскоўскі.