Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Мітрапаліт Кандрусевіч наведаў парафію Божай Міласэрнасці ў Любані
Беларусь - Мінска-Магілёўская архідыяцэзія
15.05.2017 11:13

14 мая Мітрапаліт Мінска-Магілёўскі арцыбіскуп Тадэвуш Кандрусевіч сустрэўся з вернікамі парафіі Божай Міласэрнасці ў Любані (Вілейскі дэканат). Парафіяне віталі арцыпастыра паводле старажытнага звычаю — з хлебам і соллю, выказваючы радасць, што маюць магчымасць прымаць у сябе і маліцца разам са сваім біскупам. 

Напачатку літургіі пробашч парафіі кс. Аляксандр Барыла распавёў іерарху пра мясцовую парафію, пра веру і надзею парафіян, папрасіў прамовіць да сабраных вернікаў слова і ўдзяліць сваё пастырскае благаслаўленне.

У гаміліі Мітрапаліт Тадэвуш падкрэсліў сувязь аб’яўленняў Маці Божай у Фаціме і Езуса Міласэрнага св. Фаустыне, якія аб’ядноўвае адна ідэя — Божая міласэрнасць. «Бог міласэрны і чакае, каб мы вярнуліся да сяброўства з Ім. Ён вядзе нас да гэтага сяброўства ў Касцёле», — сцвердзіў іерарх.

Разважаючы пра важнасць вуглавога каменя і моцнага падмурку арцыпастыр зазначыў, што калі мы будзем будаваць жыццё на Евангеллі, то ніякія выклікі нашага часу не пашкодзяць нам. «Калі мы будзем прытрымлівацца вучэння Езуса, ісці дарогай Евангелля і жыць праўдай навучання Касцёла, то будзем жыць жыццём Божым», — заключыў арцыпастыр.

Напрыканцы Эўхарыстыі арцыбіскуп Тадэвуш Кандрусевіч удзяліў пастырскае благаслаўленне і пажадаў вернікам, каб Езус быў у іх жыцці дарогай, праўдай і жыццём.

Пасля св. Імшы іерарх благаславіў будаўніцтва дома для патрэбаў парафіі, якое распачала любанская парафія, а таксама заклаў капсулу з падпісаным дакументам і благаславіў вуглавы камень. Ксёндз Аляксандр Барыла разам з вернікамі выказалі ўдзячнасць Мітрапаліту Тадэвушу за падтрымку распачатай справы будаўніцтва, якая з’яўляецца для парафіі знакам вялікай Божай міласэрнасці.


Кацярына Дурко
Фота аўтара

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.