Фота Аўдыё Відэа  
be  ru  pl  en  de info@catholic.by
Імша ў ноч на ўрачыстасцях у Будславе: папскі легат перадаў беларускім грэка-католікам рэліквію св. Язафата Кунцэвіча
Беларусь - Мінска-Магілёўская архідыяцэзія
02.07.2016 01:41

«Разам з Марыяй мы сёння дзякуем Богу за сярэбраны юбiлей адраджэння структур Каталiцкага Касцёла ў Беларусi», — сказаў на святой Імшы ў ноч з 1 на 2 ліпеня падчас урачыстасцяў у Нацыянальным санктуарыі ў Будславе Мітрапаліт Мінска-Магілёўскі арцыбіскуп Тадэвуш Кандрусевіч.

У Эўхарыстыі ўдзельнічаў спецыяльны пасланнік Папы Францішка арцыбіскуп Вены кардынал Крыстаф Шонбарн ОР, які падчас яе перадаў беларускім грэка-католікам рэліквію святога Язафата Кунцэвіча.

Імшы папярэднічала велічная працэсія з копіяй абраза Маці Божай Будслаўскай.

Дапаможны біскуп Мінска-Магілёўскай архідыяцэзіі Аляксандр Яшэўскі SDB агучыў на Імшы ліст Папы Францішка да легата на ўрачыстасці ў Будславе кардынала Крыстафа Шонбарна і прывітальнае слова новага Апостальскага Нунцыя ў Беларусі мансеньёра Габара Пінтэра.


«Мы суправаджаем Цябе, дастойны наш брат, у Тваёй місіі выканання гэтага задання. Урэшце з радасцю ўдзяляем Табе Нашае Апостальскае благаслаўленне, знак нашай добразычлівасці да Цябе і нябеснага дару; перадай жа яго ўсім удзельнікам цэлебрацыі», — гаворыцца ў лісце Папы да кардынала Крыстафа Шонбарна.

«Калі вы сёння сабраліся ў Нацыянальным санктуарыі Божай Маці, каб з радасцю і надзеяй паглядзець на 25 гадоў падараванай Богам гісторыі Мінска-Магілёўскай мітраполіі і дзякаваць за іх, я прашу кожнага з вас асаблівым чынам маліцца за нашага Святога Айца Францішка, за ўсю нашу краіну Беларусь, аб шматлікіх і святых пакліканнях да святарства і манаскага жыцця, за шматлікія добрыя хрысціянскія сем’і», — адзначаецца ў слове новага Апостальскага Нунцыя ў Беларусі.



«У цяжкiя часы ганенняў на веру наш народ даверыўся Марыi, i сёння наша Апякунка — Божая Мацi Будслаўская — у працэсii прывяла да алтара, каб на iм скласцi эўхарыстычную ахвяру падзякi за свабоду веравызнання i дар адраджэння веры, перапрасiць за не да канца выкарыстаныя магчымасцi, якiя нам дае Божы Провiд, i таксама прасiць благаслаўлення на будучыню», — сказаў у гаміліі Мітрапаліт Тадэвуш Кандрусевіч.
 
«Сёння мы дзякуем Богу за дар хрысціянскай веры. Больш за тысячу гадоў у часы спрыяльных для яе росквіту i часы ганенняў яна апладняла нашу зямлю i працягвае гэта рабіць, на фундаменце Евангелля творачы новы Божы народ. Дзякуючы хрысціянству Беларусь не з’яўляецца краінай, дзе паляцца вогнішчы нянавісці i адбываюцца рэлігійныя войны», — звярнуў увагу арцыпастыр.



Па словах іерарха, «схіляючы галовы перад тымi, хто баранiў веру i яе адраджаў, мы, iх нашчадкі, павінны заставацца вернымі сваёй хрысціянскай спадчыне, бо яна — наш выпрабаваны стагоддзямі падмурак для шчаслівай будучыні».

Мітрапаліт дадаў, што гiсторыя хрысцiянства i Касцёла на беларускай зямлi —«добры ўрок на будучыню, што з Божай дапамогай мы можам дасягнуць вялiкiх рэчаў, калi толькi будзем жыць згодна з хрысцiянскiмi каштоўнасцямi».


Арцыбіскуп звярнуў увагу, што хрысцiянская цывiлiзацыя беларускага народа «не з’яўляецца чымсьцi скамянелым, яна патрабуе развiцця, патрабуе не толькi традыцыi i ўкрытых у зямлi каранёў гэтага шматвяковага дрэва нашай веры, але таксама новых маладых зялёных галінак і лiсцяў». Таксама, па словах Мітрапаліта, трэба памятаць, што «хрысцiянства з’яўляецца патрабуючым»: «гэта пастаянная барацьба праўды з фальшам, дабра са злом, прыгажосцi з брыдотай, этыкi з грахом, свабоды са зневальненнем, каштоўнасцяў з антыкаштоўнасцямi, сэнсу з бессэнсоўнасцю, жыцця са смерцю, iснавання з небыццём».

«Каб у гэтай барацьбе перамагчы, недастаткова толькi верыць у Бога. Трэба яшчэ заставацца верным Яму. Гэта азначае, што не можа быць супярэчнасцi памiж тым, у што мы верым, i тым, як жывём», — патлумачыў іерарх.

Мітрапаліт дадаў, што вернасць хрысцiянскiм караням «не азначае механiчнага капiявання прыкладаў з мiнулага»: «яна павiнна быць творчай, гатовай адплысцi на глыбiню, адкрытай на новыя выклiкi, чулай да знакаў часу». «Праяўляецца яна таксама i ў клопаце аб развiццi роднай культуры, у якой ужо дзесяць стагоддзяў прысутнiчае хрысцiянскi элемент. Вернасць караням азначае і ўменне будаваць сувязь памiж гiстарычныiмі каштоўнасцямi, якiя былi выпрабаваны часам, i выклiкамi сучаснасцi, памiж верай i культурай, Евангеллем i жыццём, — як кажа св. Ян Павел II», — заўважыў арцыбіскуп.

«Гэтую творчую вернасць чалавек сам без Божай дапамогi не можа перадаць iншым. Марыя прыняла Божую волю, засталася ёй вернай, перадала людзям свайго часу i перадае нам. Як Мацi Мiласэрнасцi, Яна заўсёды клапоцiцца пра нас i нiколi не пакідае адных з нашымi праблемамi, — сказаў іерарх. — Марыя, як Мацi Мiласэрнасцi, заўсёды з намi, каб даць нам надзею, нават насуперак надзеi».

«Мацi Божая Будслаўская, Ты ўжо больш за чатырыста гадоў баронiш нас i вядзеш да Твайго Сына, у Юбiлейны Год Божай Мiласэрнасцi i ў юбiлей 25-годдзя адраджэння структур Каталiцкага Касцёла ў Беларусi Табе давяраем наш лёс. Выпрасi ў свайго Сына ласку заўсёды заставацца вернымi нашаму хрысцiянскаму паклiканню, быць яго сведкамi i баранiць духоўныя каштоўнасцi, якiмi Бог нас адорвае ў адроджаным Касцёле», — з гэтымі словамі звярнуўся арцыбіскуп Тадэвуш Кандрусевіч да Панны Марыі.

Падчас Імшы папскі пасланнік кардынал Крыстаф Шонбарн перадаў беларускім грэка-католікам рэліквію св. Язафата Кунцэвіча — набедранік, частку яго арцыбіскупскага адзення.

«Атрымаць каштоўную рэліквію, набедранік — знак архіпастырскага служэння св. Язафата — для нас духоўнае ўмацаванне ў нашай веры і вернасці Рымскаму Апостальскаму Пасаду, заахвочванне да руплівага сведчання Евангелля», — адзначыў Апостальскі візітатар для грэка-католікаў Беларусі архімандрыт Сяргей Гаек.

(AG),

Фота Міколы Новікава

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Беларусь - Мінска-Магілёўская архідыяцэзія

22.05 14:32Польскі евангелізатар Ян Будзяшак стане госцем МСМ-2017 у Івянцы
22.05 14:25У Мінску назвалі пераможцаў журналісцкага пралайф-конкурсу «Жыццё пад Сэрцам»
22.05 14:14«Спажываць хлеб вечнага жыцця»: Першая Камунія ў мінскай архікатэдры
22.05 08:34Нясвіжскі касцёл ізноў стаў пляцоўкай для фестывалю ХХІІ свята мастацтваў «Музы Нясвіжа»
21.05 20:00У Мінску памаліліся за біскупа Аляксандра Яшэўскага SDB з нагоды 25-годдзя манаскага жыцця (+фота)
19.05 16:52Упершыню для ўдзельнікаў сустрэчы моладзі ў Івянцы арганізуюць каталіцкі квіз
18.05 11:49Біскуп Аляксандр Яшэўскі SDB: чалавек і магчымасць яму дапамагчы — самае важнае для мяне
15.05 22:13«Першымі пілігрымамі» ў жодзінскі санктуарый сталі іерархі і святары архідыяцэзіі
15.05 11:13Мітрапаліт Кандрусевіч наведаў парафію Божай Міласэрнасці ў Любані
14.05 14:54У дзень 100-годдзя фацімскіх аб’яўленняў фігура Маці Божай Фацімскай прыбыла ў Вілейку