21 мая адбылася пілігрымка вернікаў парафіі Божага Цела ў Мінску ў санктуарый Маці Божай Будслаўскай з нагоды Юбілейнага Года Божай Міласэрнасці.

У суботнюю сонечную раніцу на прыступках капліцы Маці Божай Шкаплернай сабраліся парафіяльныя душпастыры, манахіні-катэхеткі, старэйшае пакаленне і сем'і з немаўлятамі, моладзь і першакамунійныя дзеці з бацькамі – у цэлым каля 120 чалавек.

Першым прыпынкам парафіяльнай пілігрымкі стала будслаўская базыліка. Пад спеў песні да Маці Божай Будслаўскай пілігрымы на каленях, з ружанцам у руках і з малітвай прайшлі традыцыйны шлях вакол алтара, у якім знаходзіцца цудадзейны абраз Апякункі Беларусі.

Кульмінацыяй малітвы стала святая Імша, якую ўзначаліў пробашч парафіі айцец Сяргей Трысцень OCD, дзякуючы Богу за ўсе дары і з просьбай аб далейшым благаслаўленні для парафіі Божага Цела ў Мінску, а асабліва просячы падтрымкі ў справе пабудовы касцёла. Гамілію прамовіў душпастыр будслаўскага санктуарыя а. Юзафат Кунцэвіч. Пасля Імшы ўсе разам праславілі Бога маёвым набажэнствам, складаючы праз рукі Панны Марыі, Маці і Апякункі, просьбы і інтэнцыі, з якімі прыбылі ў гэтае святое месца.

Другім прыпынкам пілігрымкі стала славутая мядзельская Кальварыя, дзе перад Брамамі Прабачэння пілігрымаў сустрэў настаяцель супольнасці кармэлітаў босых у Мядзелі а. Юрый Кулай OCD. Пасля словаў прывітання і кароткай гісторыі айцец кармэліт разам з пілігрымамі прайшоў Крыжовы шлях, спыняючыся пры кожнай стацыі і разважаючы над тым, што перажыў Езус Хрыстус, несучы крыж на Галготу. Малітва Крыжовага шляху завяршылася на гары Трох крыжоў, дзе для вока паломніка адкрываюцца чароўныя краявіды мядзельскага краю з яго азёрамі, узгоркамі і палескамі. Пілігрымам здавалася, што дзень затрымаўся ў гэтым месцы. Сузіраючы гэтую прыгажосць, ім хацелася няспынна дзякаваць Богу за жыццё, за кожную хвіліну, за падтрымку і Ягоны Провід.

Поўныя ўражанняў, адноўленыя духоўна і фізічна, парафіяне вярнуліся ў Мінск, каб раздзяліць гэтую радасць і спакой з тымі, хто не змог паехаць у гэтае святое падарожжа.