16 жніўня ў парафіі Святога Роха ў вёсцы Палачаны (Мінска-Магілёўская архідыяцэзія, Маладзечанскі дэканат) адзначылі галоўную парафіяльную ўрачыстасць.

Перажыць гэтае свята разам з вернікамі парафіі Святога Роха прыйшлі пілігрымы з суседняй парафіі  Божага Цела ў вёсцы Беразінскае. Іх прывітаў на пачатку святой Імшы пробашч ксёндз Сяргей Бараўнёў.

Імшу ўзначаліў ксёндз прэлат Эдмунд Даўгіловіч, які нагадаў, што хрысціянін - гэта радасны чалавек і ў такія святочныя дні на яго твары павінна зіхацець усмешка. Гамілію прамовіў ксёндз прэлат Андрэй Стэцкевіч.

Пасля Імшы адбылося выстаўленне Найсвяцейшага Сакрамэнту і працэсія вакол касцёла.

Потым па традыцыі адбылася індывідуальная малітва над кожным з прысутных праз заступніцтва св. Роха. Святкаванне завяршылася канцэртам духоўнай музыкі.

Андрэй Бурак (AG)