Кс. Караль Тамэцкі напісаў кнігу пра значэнне часу ў рымскай літургіі |
Беларусь - Мінска-Магілёўская архідыяцэзія
|
15.04.2015 15:57 |
Новая кніга кс. Караля Тамэцкага, святара, які шмат гадоў выконваў пастырскае служэнне на Магілёўшчыне, пабачыць свет 16 красавіка.
У кнізе “Аб прызначэнні часу. Новы дзень, тыдзень і год з іх мінулым у рымскай літургіі” (O przeznaczeniu czasu. Nowy dzień, tydzień i rok z ich przeszłością w liturgii rzymskiej) аўтар разважае пра арганізацыю часу ў традыцыйнай рымскай літургіі.
У сацыяльнай сетцы Facebook створаная адмысловая старонка, на якой плануецца публікацыя асобных частак новай кнігі.
У 2011 годзе кс. Караль Тамэцкі выдаў “Малую кніжачку аб клапатлівасці” (Mała książeczka o troskliwości), якая з’яўляецца зборам развагаў, датычных розных сфераў дзейнасці Касцёла, з гледзішча пробашча парафіі ў Бялынічах.
Шмат часу і сілаў кс. Караль Тамэцкі прысвяціў вывучэнню гісторыі Касцёла на Магілёўшчыне. Ён з’яўляецца сааўтарам “Гісторыі каталіцкага касцёла ў Фашчаўцы” (2002) і аўтарам працы “375 год Бялыніцкай іконе Маці Божай/250 год Яе каранавання” (2011).
Аб аўтары:
Ксёндз Караль Тамэцкі нарадзіўся 25 ліпеня 1969 г. у г. Бельска-Бяла ў Польшчы.
У 1994 г. прыняў прэзбітэрскае пасвячэнне. Амаль адразу пасля прыняцця пасвячэння прыехаў несці святарскую паслугу ў Беларусь на Магілёўшчыну. Спрычыніўся да адраджэння амаль усіх парафій у рэгіёне.
Ксёндз Караль Тамэцкі быў піянерам у стварэнні першых беларускіх парафіяльных сайтаў – у 1999 годзе стварыў сайты Чавусаў і Мсціслава - cavusy.mscislaw.org.pl і mscislaw.org.pl.
Выконваў святарскае служэнне ў Мсціслаўі, таксама быў кіраўніком Мсціслаўскага дэканату. У 2008 годзе быў накіраваны ў Бялынічы, адкуль з-за стану здароўя быў вымушаны выехаць, не дачакаўшыся на працягу больш чым года замены.
Зараз з’яўляецца вікарыем парафіі Найдаражэйшай Крыві Пана Езуса ў м. Быстра (Польшча).
Паводле mohylev-katolik.by (AG)
|