11 кастрычніка слухачы «Школы сямейнага жыцця» ў Мінску распачалі новы 2014/2015 навучальны год. Святая Імша з гэтай нагоды адбылася ў капліцы «Caritas» Мінска-Магілёўскай архідыяцэзіі.У гаміліі кс. д-р Андрэй Стэцкевіч звярнуў увагу на важнасць Евангелля ў жыцця сучаснай сям’і.

Пасля Імшы кс. Андрэй Стэцкевіч прадставіў слухачам інаўгурацыйны даклад на тэму «Дзейнасць на карысць сям’і ў Беларусі». Святар адзначыў важнасць Сіноду Біскупаў, прысвечанага сужэнству і сям’і, які праходзіць з 5 па 19 кастрычніка ў Ватыкане і ўдзельнікі якога разважаюць над галоўнымі праблемамі сям’і. Выступоўца дадаў, што клопат аб сям’і з’яўляецца сёння найважнейшай інвестыцыяй у будучыню, а той, хто не інвестуе ў будучыню, — той яе знішчае.

Па словах дакладчыка, кожная дзяржава мае абавязак падтрымліваць сям’ю, і не можа быць пытання, дапамагаць ёй ці не. Таксама святар прадставіў статыстычныя даныя, звязаныя з сям’ёй. Адзначыўшы, што наша дзяржава ўзяла на сябе абавязак дапамагаць сям’і і робіць гэта ў многіх сферах, кс. Андрэй Стэцкевіч звярнуў увагу, што з другога боку, аднак, існуе праблема велізарнай колькасці разводаў і абортаў. Святар заўважыў, што развод — гэта не толькі адыход мужчыны ад жанчыны, але і цэлы шэраг наступстваў, якія ён нясе за сабой.

Выступоўца ўзгадаў таксама пра шэраг дзеянняў, якія робіць Каталіцкі Касцёл на карысць сям’і, — між іншым, пра «Школу сямейнага жыцця» ў Мінску і Гродне, якая рыхтуе кансультантаў і дарадчыкаў сямейнага жыцця, пра канферэнцыі, сіпозіумы, фармацыйныя сустрэчы, рэкалекцыі і шмат розных груп у падтрымку сям’і, якія існуюць у Касцёле.

Пасля дакладу слухачы першага курса «Школы сямейнага жыцця» — 23 чалавекі — атрымалі заліковыя кніжкі. Затым распачаліся заняткі паводле праграмы навучання.

А. Пётр Фраштэнга OCD, AG