У чацвер у Ватыкане завяршаецца праца ўдзельнікаў Сінода Біскупаў на круглых сталах. Як праходзіла абмеркаванне і чаго чакаць далей? У экслюзіўным каментары для Catholic.by — Мітрапаліт Тадэвуш Кандрусевіч, адзіны прадстаўнік Беларусі на Сінодзе.

— Ваша Эксцэленцыя, завяршылася праца круглых сталоў. Як прайшла праца Вашай групы?

— Англамоўны круглы стол, у якім я прымаў удзел, вельмі добра зразумеў заданне, якое было пастаўлена перад ім, а менавіта — падрыхтоўка прапаноў, новых ідэй і ўдасканаленне паслядэбатнай справаздачы, прадстаўленай 13 кастрычніка. Менавіта гэты тэкст стаў прычынай многіх каментароў і выклікаў гарачыя дыскусіі і абмеркаванні ў свеце. Прычынай таму былі некаторыя, можа, не вельмі ўдалыя фармулёўкі справаздачы.

У гэтым сэнсе наша група была знітавана ідэяй удасканаліць тэкст такім чынам, каб ён паказваў  заклапочанасць Касцёла як праблемай сям’і і захаваннем жыцця, так і вырашэннем гэтых праблем згодна з вучэннем Касцёла. Мы стараліся прымаць пад увагу таксама, што вучэнне Касцёла развіваецца і яго неабходна ўлічваць падчас прыняцця рашэнняў.

Удзельнікі нашага круглага стала былі аднадушнымі ў тым, што Касцёл не можа ўпадабняцца свету і жыць пад яго дыктоўку, аднак у сваёй дзейнасці павінен абапірацца на Хрыста. Спрэчкі, канешне, былі — без іх нельга абысціся. Але яны вяліся ў духу ўзаемнай павагі да свабоднага волевыяўлення выступоўцы.

У пошуку адказаў на вострыя пытанні ўдзельнікі нашага круглага стала прытрымліваліся вучэння Касцёла, памятаючы пры гэтым, што Касцёл павінен прытуліць у «больш канкрэтнай апецы» тых, хто знаходзіцца ў складанай сітуацыі, каб яны ўзбагаціліся Божай ласкай.

— Ці быў тэкст паслядэбатнай дыскусіі дасяжны кожнаму з удзельнікаў круглага стала?

— Тэкст паслядэбатнай справаздачы быў публічным і ім мог карыстацца кожны. Кожны з біскупаў атрымаў яго на круглым стале, добра ведалі яго змест і журналісты. Думаю, менавіта абнародванне тэксту і прывяло да непаразуменняў. Вядома, журналісты задавалі пытанні адносна тэксту справаздачы, і гэтыя пытанні былі часта правакацыйнымі. Найчасцей жа журналісты рабілі з гэтага дакумента свае высновы, кшталту: Папа ўжо дазволіў гомасексуальныя шлюбы, а разведзеныя і тыя, хто жывуць у другім шлюбе, могуць прымаць Камунію. Папа нічога такога не казаў і не прымаў падобных рашэнняў, але журналісты ў пошуках «гарачых» фактаў зноў выдалі жаданае за рэчаіснасць.

— Ці вядома, як праходзіла праца на іншых круглых сталах?

— Не сакрэт, што падчас перапынкаў на каву ці пры іншых магчымасцях біскупы дзеляцца сваімі ўражаннямі. Што заўважыў у гэтай сувязі я: падобны дух супрацоўніцтва ў імкненні як мага лепш дапрацаваць прадстаўленую паслядэбатную справаздачу, дух адказнасці за сям’ю панаваў на ўсіх круглых сталах. Можна было пачуць пра абмен і даволі вострымі думкамі і меркаваннямі. Але заўсёды перамагаў здаровы і памножаны на вучэнне Касцёла розум.

— Што стане вынікам працы круглых сталоў?

— Вынікам працы кожнага круглага стала стане «рэляцыя» (адмысловая справаздача — заўв. рэд.), у якой будуць прадстаўлены тыя замены і дапаўненні, да якіх пры абмеркаванні на круглым стале прыйшлі біскупы. Дакладчык кожнага з 10 круглых сталоў павінен будзе цягам 10 хвілін прадставіць свой матэрыял. Прэзентацыя матэрыялаў з круглых сталоў пройдзе 16 кастрычніка падчас 12-й генеральнай кангрэгацыі Сінода Біскупаў.

— Што будзе далей? Ці можна сцвярджаць, што гэта фінальны акорд ІІІ Надзвычайнай сесіі Сінода?

— Далей спецыяльная камісія будзе апрацоўваць усе «рэляцыі» і рыхтаваць канчатковы варыянт «Рэляцыі Сінода», які прадставяць для галасавання падчас апошняга пасяджэння Сінода Біскупаў. Гэта адбудзецца 18 кастрычніка на апошняй генеральнай кангрэгацыі.

Калі дакумент будзе прыняты, ён стане афіцыйным дакументам, які перададуць Пантыфіку. Таксама гэты дакумент стане апорным матэрыялам для падрыхтоўкі наступнага Сінода, прысвечанага тэме сям’і ў кастрычніку 2015 года.

Апрацаваў (JLS)

Фота Ватыканскага радыё