«Трэба прыходзіць да Марыі»: адпустовая ўрачыстасць ў Геранёнах

Беларусь - Гродзенская дыяцэзія

27.08.2014 13:51

26 жніўня ва ўспамін Найсвяцейшай Панны Марыі Чэнстахоўскай адбыўся адпуст у парафіі Святога Мікалая ў Геранёнах. У гэтай парафіі вернікі ўжо шмат гадоў збіраюцца ля абраза Маці Божай, каб выказаць Ёй свае падзякі і просьбы. Пробашч парафіі кс. Дмітрый Несцер у прывітальным слове адзначыў, што сёлетні адпуст з’яўляецца выключным, бо звязаны з парафіяльнымі дажынкамі. Вернікі падрыхтавалі вянок, зроблены з пладоў cёлетніх палёў, якім сімвалічна жадалі выказаць удзячнасць Богу за ўраджай гэтага года і прасілі Бога праз заступніцтва Яго Маці, каб ў кожным доме не было недастачы ў хлебе, каб кожны мог падысці да стала і адрэзаць сабе столькі, колькі пажадае. Урачыстую святую Імшу ўзначаліў а. Анатоль Ярошка OFMCap. «Трэба прыходзіць да Марыі», — падчас гаміліі гэта вельмі моцна падкрэсліў а. Віталій Бандаронак OFMCap. Святар адзначыў, што да Маці Божай трэба прыходзіць не толькі ў пешых пілігрымках раз на нейкі час, але штодзённа ў сваіх малітвах. У адпустовую ўрачыстасць вернікі жадалі падзякаваць Маці Божай за ласкі, якія штодзённа спасылае, просячы аб іх у свайго Сына, і за благаслаўленне ва ўраджаі гэтага года. Падчас літургіі асаблівым чынам маліліся за ўсіх, хто працуе на зямлі і дзякуючы каму хлеб знаходзіцца на стале ў нашым доме. Абраз Маці Божай Чэнстахоўскай знаходзіцца ў бакавым алтары геранёнскага касцёла і ўшаноўваецца на гэтых землях ужо шмат гадоў. Анастасія Мішкура

Фотарэпартаж