Распачынаюцца вечары для закаханых |
Анонсы |
28.11.2011 10:44 |
Пры касцёле святых Сымона і Алены ў Мінску будуць праводзіцца «Вечары для закаханых». Першая сустрэча адбудзецца 28 лістапада а 20-й гадзіне ў памяшканні бібліятэкі. «Вечары для закаханых» — цудоўная магчымасць распазнаць пакліканне, паглыбіць адносіны, а, магчыма, і прыняць рашэнне на будучыню. Сустрэчы будуць цікавымі і карыснымі для ўсіх пар: як тых, якія ўжо
вырашылі ажаніцца, так і тых, якія пра гэта нават не думалі. Да ўдзелу ў сустрэчах запрашаюцца асобы незалежна ад іх канфесійнай прыналежнасці. Па жаданні і магчымасцях пар «Вечары» могуць складацца з 9 сустрэч па 2–2,5 гадзіны адзін раз на тыдзень альбо заняткаў на працягу трохдзённага ўікенду. Сустрэчы праводзяць сужэнская пара і святар. Кантактныя тэлефоны: +375 29 556 26 35, +375 29 140 84 56, +375 29 782 14 66 Іван і Алена Лубінскія Асноўным метадам працы на «Вечарах» з’яўляецца праца закаханых толькі ўдваіх. Штуршком да яе з’яўляюцца ўступы і сведчанні сужэнскіх пар і святароў. Удзельнікі ў сваіх парах маюць магчымасць глыбейшага азнаямлення са сваімі рысамі характару, чаканнямі, вызначаюцца з агульнай сістэмай каштоўнасцяў у жыцці і вучацца, як вырашаць праблемы і як будаваць гармонію сваіх адносінаў. Пары даведваюцца пра сутнасць таямніцы шлюбу, адкрываюць месца веры ў сваім жыцці, знаёмяцца з асноўнымі палажэнні вучэння Касцёла пра шлюб і сям’ю. Вынікам падобных сустрэч, як паказвае практыка, з’яўляюцца моцныя сем’і, дзе пануе любоў і згода, дзе сужэнцы слухаюць адно аднаго, разумеюць сваю другую палавінку і заўсёды гатовыя прабачаць. Іван Лубінскі |