У суботу 27 красавіка вечар у Міждыяцэзіяльнай вышэйшай духоўнай семінарыі ў Гродне быў асаблівым, не падобным на звычайныя суботы ў адмысловай навучальнай установе, дзе рыхтуюць будучых святароў для трох дыяцэзій у Беларусі.
Як паведамляецца на старонцы Міждыяцэзіяльнай семінарыі ў сацыяльнай сетцы Instagram, увечары семінарыйная капліца была поўная людзей: семінарыстаў і свецкіх — у большасці, маладых хлопцаў і дзяўчат, — якія прыйшлі сюды на адарацыю Найсвяцейшага Сакрамэнту. Людзі былі не толькі з Гродна: некаторые прыехалі са сваімі душпастырамі з наваколля.
У супольнай малітве адчувалася еднасць і моц Касцёла.
Многім асабліва запамяталася маладая сем’я, якая прыйшла на адарацыю з малым дзіцём. Размясціўшыся ў канцы капліцы, яны правялі ўвесь час на каленях перад Езусам. І дзіцятка, як падалося, адчувала сябе ўтульна.
Адарацыя распачалася а 19-й гадзіне і пацягвалася да 20-й. Гадзіна з Езусам прайшла ў імгненне вока. Семінарысты падрыхтавалі разважанні на тэму паклікання, суправаджалі разважанні песнямі, але былі таксама хвіліны цішыні для асабістай размовы з Богам.
Пасля адарацыі ў аўлі Яна Паўла ІІ адбыўся канцэрт семінарыйнага музычнага гурта AVE.
Падчас выступу ўсе прысутныя разам з музыкамі маглі спяваць і праслаўляць Бога, а нават крыху патанчыць.
Семінарысты ўдзячныя Нябеснаму Айцу за Яго дабрыню, што праявілася ў гэтай асаблівай падзеі, якую Ён даў ім перажыць.
